Ајдовшчина се враќа во Првата лига на Словенија по 30 години. Во последните пет месеци на клупата со македонскиот тренер Раде Стојановиќ, словенечкиот тим прв ја помина целта и обезбеди место во елитата.
„Влегувањето во 1А лигата не е резултат на еден момент или на една личност. Тоа е резултат на секојдневна работа, дисциплина, доверба и група која одлучи да не се откаже дури и кога притисокот беше најголем. Кога дојдов во Ајдовшчина, тимот беше на третото место. Чекор по чекор, се фокусиравме на менталитетот, одговорноста и создавањето победничка култура. За мене, најважно не беа само тактиките и резултатите, туку играчите да веруваат дека можат да направат нешто големо“, изјави по тој повод македонскиот тренер.
Според него, во модерниот ракомет, талентот сам по себе не е доволен.
„Карактерот, дисциплината и континуитетот одлучуваат за одлични сезони. Она што го направи оваа група е посебно и за клубот и за градот. По 30 години, тие обезбедија место во Првата А лига и тоа ќе остане во историјата на ракометот во Ајдовшчина. Но, верувам дека е уште поважно што играчите развија победнички менталитет во овој период. Секогаш велам дека успехот не треба да ги менува луѓето – треба да ги мотивира да работат уште понапорно и да останат скромни. Благодарен сум им на играчите, клубот и навивачите за нивната доверба. Овој успех им припаѓа на сите што веруваа во оваа приказна од првиот ден – рече експертот, цитиран од balkan-handball.
Стојановиќ работеше во Трим од Требње, а во домашниот ракомет ги водеше Металург, Охрид, Тиквеш, како и јуниорската репрезентација. Во финалето од плејофот ќе играат Слован и Целје Пивоварна Лашко.
