Ракометниот клуб Пролет 62 соопшти дека поради завршувањето на договорот со нивниот долгогодишен генерален спонзор, донесена е одлука да се повлечат од натпреварувањето во Супер лигата за претстојната сезона.
Оваа одлука, според тимот, е донесена со цел да се зачува стабилноста и иднината на клубот. „Веруваме дека во овој момент најодговорен чекор е да не преземаме финансиски обврски кои не би можеле целосно и навремено да ги исполниме“, стои во соопштението.
РК Пролет 62 ќе продолжи со развој на млади ракометари и продолжување на традицијата која клубот ја гради веќе 64 години. Клубот ќе продолжи да се натпреварува во Првата лига, а во наредниот период нивен главен приоритет ќе биде пронаоѓање нов генерален спонзор кој ќе овозможи повторно враќање во Супер лигата.
„Уверени сме дека ова е само еден тежок период кој, со заедничка поддршка и нов партнер, ќе го надминеме и повторно ќе го вратиме Пролет таму каде што припаѓа“, велат, меѓу другото, од РК Пролет 62.
