Дејвид Бекам, поранешната ѕвезда на Манчестер Јунајтед, Реал Мадрид и Англија, испиша историја, но овој пат надвор од фудбалот. Според најновата листа на богати на „Сандеј Тајмс“ за 2026 година, Дејвид и неговата сопруга Викторија Бекам го дуплирале своето богатство во изминатата година, достигнувајќи неверојатни 1,35 милијарди евра.
Скокот ги става на второ место меѓу најбогатите спортски семејства во Велика Британија, веднаш зад семејството на Берни Еклстоун, поранешниот шеф на Формула 1.
Иако ги „закачи копачките“ во 2013 година, бизнис и маркетиншката остроумност на Бекам се покажаа прецизни како и неговите слободни удари во текот на неговата кариера.
Постојат неколку клучни фактори што го лансираа во „Клубот на милијардерите“. Првиот е проектот со Интер Мајами, бидејќи тоа е неговата најпрофитабилна инвестиција.
Клубот од МЛС лигата, во ко-сопственост на Бекам, забележа астрономски раст, особено по потпишувањето на Лионел Меси.
Интер Мајами моментално се проценува на околу 1,2 милијарди евра, што го прави највредната франшиза во МЛС.
Дополнително, Бекам, на 51 година, останува едно од најпрепознатливите лица на планетата. Неговите профитабилни и долгорочни договори со гиганти како што се Адидас и Хуго Бос продолжуваат да носат десетици милиони годишно.
Неговата продуцентска компанија Студио 99 и брендот за додатоци во исхраната IM8 исто така бележат одлични резултати, а неговата холдинг компанија исплаќа огромни дивиденди.
Иако титулата „првиот милијардер спортист“ му се припишува на Дејвид, богатството е поделено и Викторија игра огромна улога во тоа.
Откако стекна светска слава како член на Спајс Грлс, Викторија успешно изгради луксузен бренд за мода и козметика кој денес носи огромни профити низ целиот свет. Двајцата функционираат како совршен бизнис тандем.
Интересно е што успехот на Бекам доаѓа во време кога другите големи британски спортски инвеститори забележаа загуби.
На пример, Сер Џим Ратклиф (ко-сопственик на Манчестер Јунајтед) го виде своето богатство значително намалено поради проблеми со неговата компанија Инеос. Од друга страна, возачот на Формула 1, Луис Хамилтон, исто така е на листата со околу 500 милиони евра, а голферот Рори Мекилрој вреди 370 милиони евра.
