По повеќе од две децении доминација во светскиот фудбал, Кристијано Роналдо отвори ново поглавје во својата кариера – стана ко-сопственик на шпанскиот второлигаш УД Алмерија.
Португалецот купи 25 проценти од акциите во клубот преку својата компанија „CR7 Sports Investments“, пишува „Дејли меил“.
Иако на 41-годишна возраст сè уште игра и постигнува голови за Ал-Наср, Роналдо со овој потег се обиде и во улогата на инвеститор.
„Одамна имам амбиција да придонесам за фудбалот надвор од теренот. УД Алмерија е шпански клуб со силни темели и јасен потенцијал за раст. Со нетрпение очекувам да соработувам со одборот за да го поддржам клубот во неговата следна фаза од развојот“, рече капитенот на португалската репрезентација.
Финансиските детали не беа откриени, но оваа инвестиција го означува враќањето на Роналдо во шпанскиот фудбал, каде што помина девет сезони освојувајќи трофеи во дресот на Реал Мадрид пред да замине во Јувентус во 2018 година.
Алмерија моментално е на третото место во втората шпанска лига, само два бода зад лидерите и со 15 натпревари до крајот на сезоната. Интересно е што Роналдо е постар од самиот клуб, кој е основан во 1989 година. Неговото влегување во сопственичката структура доаѓа една година откако клубот беше преземен од саудиска инвестициска група.
Претседателот на клубот Мохамед Ал Кереиџи, кој го олесни трансферот на Роналдо во Ал-Наср во 2022 година, рече дека е задоволен од изборот на фудбалската легенда.
„Исклучително сме задоволни што Кристијано го избра нашиот клуб за да инвестира. Го сметаме за најдобар играч на сите времиња, тој многу добро го познава шпанскиот фудбал и го разбира потенцијалот на она што го градиме, и со првиот тим и со академијата.“
Првиот натпревар на Алмерија со Роналдо како ко-сопственик е закажан за петок, кога ќе гостуваат во Албасете.
Овој потег доаѓа 14 месеци откако Роналдо навести дека еден ден можеби ќе се обиде да стане сопственик, споменувајќи го Манчестер Јунајтед.
Зборувајќи на доделувањето на наградите „Дубаи Глоуб Сокер“ во декември 2024 година, тој рече: „Го кажав тоа пред година и пол и ќе го кажам повторно: проблемот не се менаџерите. Секогаш го користам истиот пример, оној со аквариумот. Ако рибата во него е болна, ја извадите, го поправите проблемот и ја вратите, таа повторно ќе се разболи. Проблемот на Манчестер Јунајтед е ист. Не е секогаш вината на менаџерот, проблемот е многу подлабок. Да бев сопственик на клубот, ќе ги средев работите и ќе го поправев она што не е во ред.“
Коментарите следеа по неговото познато интервју со Пирс Морган во 2021 година, во кое тој ги критикуваше сопствениците на Јунајтед, семејството Глејзер.
„Сопствениците на клубот, Глејзерови, не се грижат за клубот. Манчестер Јунајтед е, како што знаете, маркетиншки клуб. Тие ќе заработуваат пари од маркетинг, но според мене воопшто не се грижат за спортот. Постојат работи во клубот што не му дозволуваат на Манчестер да го достигне највисокото ниво, она каде што се Сити, Ливерпул, па дури и Арсенал. Тоа е комплицирано и тешко“, рече Роналдо во тоа време.
