Драматични сцени доаѓаат од АТП Челинџер турнирот во Фуџаира во Обединетите Арапски Емирати.
За време на натпреварот помеѓу Данило Остапенков и Хајато Мацуока, во близина на теренот одекна силна експлозија, по што играчите, судиите и другите присутни го напуштија теренот во паника. Сè беше снимено на видео кое се прошири на социјалните мрежи.
Видео споделено на X покажува навидум рутинска размена на удари. Но, по околу дваесет секунди, се слуша оглушувачки тресок – во истиот момент, играчите ги испуштаат своите рекети и трчаат кон излезот, а нив ги следат судиите. Видеото не покажува никакви повреди или штети на самиот терен, но реакцијата на сите присутни јасно покажува колку била застрашувачка ситуацијата.
When you play tennis and they say bombs are arriving…. pic.twitter.com/wODTWzGv5w
— Stefano Berlincioni (@Carretero77) March 3, 2026
Објавата брзо собра илјадници прегледи, а коментарите беа преплавени со шок и прашања за безбедноста на турнирот. Некои корисници се прашуваа и зошто натпреварот се одржува на таа локација, додека други изразија страв за играчите и организацијата на настанот.
Набрзо стана јасно дека шокот на тенискиот терен е резултат на посериозен инцидент во областа. Според локалните и меѓународните медиуми, воздушната одбрана на Обединетите Арапски Емирати пресретнала дрон над Фуџаира, а потоа остатоците паднале во областа на блиското нафтено пристаниште и предизвикале пожар.
Властите соопштија дека пожарот брзо бил ставен под контрола, нема пријавени повредени, а пристанишните операции се продолжени. Целиот настан се одвива во атмосфера на зголемени тензии во регионот и страв од можни нови инциденти.
