Шпекулациите за бојкот на Гренд слем продолжуваат откако многу елитни тенисерки изразија загриженост за распределбата на парите на големите турнири, а по Арина Сабаленка, Коко Гоф и Јаник Синер, се огласи и Медисон Кис. Американката беше доста остра, велејќи дека игнорирањето на Гренд слем турнир е единствениот начин.
– Верувам дека е многу важно гласот на тенисерките да се слушне повеќе во големите одлуки од кои многу зависат. Со години, играчите се обидуваат да седнат и да разговараат со организаторите на Гренд слем турнирите. Нема голем напредок – рече Кис.
Потоа таа коментираше за бојкотот што веќе интензивно се најавува и рече дека, ако ова е начин да се исполнат некои барања, тогаш таа е „за“.
– Сега голем број тенисерки се собраа и се согласија дека ако е неопходен бојкот, тогаш ќе бојкотираме. Се надевам дека нема да дојде до тоа. Но, убаво е да се види како многу тенисери се здружуваат и се подготвени да се борат за интересите на сите. Мислам дека ова е нешто за кое ќе се зборува сè додека не се случи. Јас сум подготвена. Тоа е нешто за кое мислам дека голем број тенисери се подготвени. Да се види дека толку многу луѓе се подготвени да одат толку далеку е доста инспиративно – рече Кис.
Засега, овие гласови не се толку радикални за да размислат да го прескокнат Ролан Гарос, но тенисерите, еден по еден, излегуваат напред и објавуваат дека се подготвени за следниот, голем чекор.
