Американката Џесика Пегула ја освои титулата на турнирот ВTA 1000 во Дубаи со награден фонд од 4 милиони американски долари.
Во финалето, четврторангираната Пегула ја победи Украинката Елина Свитолина со 6:2, 6:4 и ја прослави својата десетта титула во кариерата на турнири во поединечна конкуренција.
Пегула, која мораше да игра натпревари од три сета во претходните две кола, речиси и да немаше тешкотии против седмата носителка Свитолина.
Од самиот почеток, Американката успеа да поведе во играта со 3:0 со два брејка, а до крајот на првиот сет ѝ дозволи на противничката да ѝ го земе сервисот само еднаш.
Во вториот сет, Пегула повторно беше подобрата тенисерка на теренот. Таа направи брејк во својата прва можност за тоа – за 3:2 во петтиот гем, а до крајот имаше уште три можности за брејк, вклучувајќи и меч-поен во деветтиот гем, кој Свитолина го спаси.
Сепак, ова не беше од особено значење, бидејќи веднаш потоа во десеттиот гем Пегула имаше шанса да го затвори мечот на свој сервис и успеа да го стори тоа на својата трета меч-топка.
За Пегула, ова е прва титула во Дубаи, додека Свитолина се бореше за својата трета титула по оние во 2017 и 2018 година.
