Дино Прижмиќ вчера во Рим го победи Новак Ѓоковиќ, а по мечот, со многу убави и одбрани зборови, тој раскажа како успеа да надигра еден од најголемите тенисери на сите времиња.
– Ова беше голем момент за мене, беше феноменално да го споделам теренот со легенда, за која можам да кажам дека играше неверојатно – рече 20-годишниот Хрват кој ја зазема 79-та позиција на светската листа, најдобрата во неговата кариера.- Знам дека Новак не играл долго време, затоа ми беше полесно, иако ве уверувам дека сепак беше многу тешко. Особено во првиот сет во кој играше извонредно.
По убедливиот прв сет за Ѓоковиќ, малкумина се сомневаа дека ќе се случи таков пресврт.
Dino’s breakthrough moment 🌟🥹#IBI26 pic.twitter.com/KdcZxi85YT
— Internazionali BNL d'Italia (@InteBNLdItalia) May 8, 2026
– Од моментот кога поведе, се обидов да останам во натпреварот, да ја задржам концентрацијата и на крајот се исплатеше. Не знам ни како успеав, само сакав да уживам во секој момент на теренот – го опиша успехот со 2:6, 6:2, 6:4.
По подвигот, му оддаде почит на својот голем противник.
– Чувството по таков триумф е навистина одлично. Немам зборови. Никогаш не помислив дека можам да го победам. Имам голема почит кон Новак, тој е мој идол. Сега морам да го сварам тоа, бидејќи следниот натпревар ме чека за два дена. Морам да бидам подготвен за тој следен предизвик – додаде Прижмиќ, кој со овој подвиг најави продолжување на традицијата дека неговиот град произведува врвни асови.
Тој е од Сплит, и речиси нема генерација од овој град која не произведела еден одличен играч – од Никола Пилиќ, преку Жељко Франуловиќ и Горан Иванишевиќ до Мариј Анчиќ, а сега Прижмиќ би можел да ја продолжи таа традиција.
