Ига Швјонтек се повлече од турнирот ВТА 500 во Нингбо поради проблем со левата бутина, што значи дека ја изгуби математичката шанса за настап завршниот турнир во сезоната, ВТА финалето во Индијан Велс.
Полската тенисерка се повреди во полуфиналето на турнирот во Вухан, каде што се соочи со сонародничката Маја Хвалински. Иако физиотерапевтот ѝ советуваше да го прекине мечот, таа одлучи да продолжи, но на крајот беше поразена во два сета.
Се покажа дека повредата не е безопасна, поради што Швјонтек беше принудена да го откаже учеството на натпреварувањето во Нингбо. Овој потег може да има големо влијание врз крајот на нејзината сезона.
По елиминацијата во Вухан, Швјонтек беше 545 поени зад Каролина Мучова, моментално осмо рангирана во трката на ВТА. Чехињата моментално е на последната позиција што обезбедува директен влез на завршниот турнир.
Полјачката има уште два турнири од ВТА 500 во квалификацискиот период, во Нингбо и Токио. Постоеше можност таа да го надомести дефицитот во поени, особено имајќи предвид дека Мучова не планираше да игра во ниту едно од тие две натпреварувања.
Сепак, повлекувањето од Нингбо практично ја затвори вратата за директен влез. Дури и во случај на триумф во Токио, Швјонтек би останала 45 поени зад Мучова.
Сепак, местото меѓу резервите е сè уште реална опција. Според моменталната ранг-листа, Швјонтек би можела да биде една од двете тенисерки кои ќе чекаат шанса да влезат на завршниот турнир. Другата резерва засега би била Марта Костјук, десетта во трката на ВТА, која сè уште може да ја загрози позицијата на Мучова со добри резултати на преостанатите турнири.
Сè уште не е познато дали Швјонтек ќе се обиде да игра во Токио или ќе одлучи да ја заврши сезоната предвреме поради повреда. Исто така, постои можност таа да патува во САД како резерва, но конечната одлука ќе зависи од нејзината физичка состојба.
Доколку не игра на Индијан Велс, тоа ќе биде прв пат од 2019 година Полјачката да не ја заврши сезоната меѓу учесничките на завршниот турнир. Иако се квалификуваше во 2020 година, турнирот тогаш не се одржа поради пандемијата на коронавирусот.
Швјонтек го постигна својот најголем успех на финалето на ВТА во 2023 година, кога убедливо ја победи Џесика Пегула со 6:1, 6:0 во борбата за титулата. Во следните две сезони, таа не успеа да ја помине групната фаза од натпреварувањето.
