Александар Зверев водеше со 6-1, 5-3 против Лучијано Дардери. Потоа имаше четири меч топки. Но, на крајот беше елиминиран од Мастерсот во Рим во осминафиналето.
Германецот го започна натпреварот добро, целосно контролирајќи ја ситуацијата. А потоа во еден момент – целосен колапс. По два часа и 26 минути, Дардери славеше со 1-6, 7-6 (10), 6-0.
На прес-конференцијата, тој се обиде да се оправда:
„Мислам дека ова е најлошиот терен на кој некогаш сум играл. На јуниорско ниво, меѓу професионалци, на фјучерс турнири, на тренинг… Никогаш не сум играл на терен со толку лош квалитет“.
Третиот играч во светот зборуваше за ветровитите услови во кои се играше натпреварот.
– Имав шанса да го завршам натпреварот, но топката ми прелета преку глава. Имав брејк поен и топката се тркалаше. Тоа е тоа. Ветерот беше силен. Требаше да го добијам мечот во два сета, тоа е сè. Потоа, очигледно, третиот сет отиде во негов правец – објасни Зверев.
