Хорхе Мартин ја заврши Големата награда на Каталонија без да освои поени и заостанува уште повеќе во генералниот пласман на Мото ГП шампионатот зад лидерот Марко Бецеки, кој сега има 15 поени предност.
Сепак, шпанскиот мотоциклист не сакаше да го гледа денот преку резултатот, ниту преку инцидентот што го имаше со Раул Фернандез, туку ја стави безбедноста на возачите и хаотичниот тек на трката на патеката „Каталуња“ во преден план.
„Мојата приказна е сосема споредна. Најважно е што Алекс и Зарко се добро. Мојот настап е нула, уште една трка без поени, но важно е што сите се живи и дека можеме да продолжиме. Ова беше многу опасен ден. Три рестартирања се, според мене, премногу. Разбирам дека мора да има спектакл, но ние сме луѓе и по вакви инциденти е тешко да се остане целосно фокусиран. Атмосферата потоа не е добра и само го зголемува ризикот да се случи нешто полошо“, рече Мартин.
.@88jorgemartin crashes out of contention! #CatalanGP 🏁 pic.twitter.com/EMJIqBVZYi
— MotoGP™🏁 (@MotoGP) May 17, 2026
Зборувајќи за сопствениот пристап, тој нагласи дека се обидува да остане што е можно пофокусиран без оглед на тоа што се случува на патеката.
„Мојата рутина е јасна. Без разлика што се случува, се фокусирам на себе. Секој пат кога излегувам на патеката станувам сè подобар и подобар, се чувствувам поподготвен. Првата трка беше добра, втората уште подобра, третата најдобра. Бев во добра позиција, но не можев да направам ништо повеќе од тоа“, објасни шпанскиот возач.
Тој се осврна и на прашањето за евентуално прекинување на трката по неколку инциденти.
„Не знам, тоа не е моја одлука. Но, три рестартирања… ако продолжи, каде е границата? Видовме амбулантни возила на патеката, моите очи беа иритирани од сè. Тешко е да се продолжи со тркање во такви услови.“
Беше особено емотивен кога зборуваше за падовите на своите колеги, нагласувајќи колку е тешко да се остане смирен во такви ситуации.
Today was a reminder of just how dangerous MotoGP can be… Glad that both Alex and Johann have been able to share positive updates from hospital 💪 pic.twitter.com/CvrzrBOM4D
— Autosport (@autosport) May 17, 2026
„Најлошо е кога гледаш колеги кои можеби се повредени, а не знаеш во каква состојба се. Секако дека мора да бидеш малку себичен за да продолжиш да возиш, но ние сме професионалци и тоа е дел од работата.“
Тој ги опиша и моментите на хаос по инцидентот меѓу Алекс Маркез и Педро Акоста.
„Ја видов раката на Акоста во воздух, прашина насекаде. Делови од моторот летаа. Дел од Дукатито доаѓаше кон мене. Успеав да го избегнам ударот, но не беше пријатно. Дури и не го видов Алекс, повеќе го следев моторот од него. Брзо се вратив во боксот за да се смирам“, рече Мартин.
На крајот, и покрај сè, тој нагласи дека и тој извлекол некои позитивни заклучоци од трката.
„Штета е што викендот имаше толку многу падови, никој не го сака тоа. Но, бев брз. По тешкиот петок, успеав да стигнам до четвртото место и да се борам за подиумот. На патека која не ни одговара премногу, тоа сепак покажува напредок“, заклучи Хорхе Мартин.
