Филип Хрговиќ стана првиот Хрват кој ја освои светската титула во тешка категорија, откако го победи Мозес Итаума со прекин во деветтата рунда во лондонската О2 арена.
Иако 21-годишниот Британец доминираше во првите шест рунди и ја одржуваше контролата со прецизни удари, Хрговиќ го издржа притисокот. Како што напредуваше борбата, Итаума почна да успорува, што хрватскиот боксер го искористи.
Во деветтата рунда, Хрговиќ го забрза темпото и го принуди Итаума да се откаже со серија удари.
„Тој е неверојатен. Ги губев сите рунди, тој беше многу брз, но од самиот почеток видов дека му снемува здив. Знаев дека морам да го изморам и да ја чекам мојата шанса“, рече Хрговиќ.
По победата, тој рече дека сака да ги обедини титулите против Даниел Дубоа или Агит Кабајел.
„Ова е мое време. Јас сум сегашноста, а тој е иднината“, рече Хрговиќ.
Итаума беше изнесен од рингот на носилка по борбата и превентивно однесен во болница. Промотерот Френк Ворен рече дека тој имал проблем со ногата и бил многу исцрпен.
„Најважно е здравјето на боксерот. Ќе му треба време да се опорави и сега не е време да зборуваме за неговата следна борба“, рече Ворен.
Хрговиќ сега се соочува со задолжителна одбрана на титулата во IBF против Френк Санчез.
