Поранешниот возач на Формула 1, Ралф Шумахер, се омажи со својот партнер Етјен Буске-Касањ на гламурозна церемонија во Сен Тропе, 19 месеци откако се изјасни како геј, објави „Дејли меил“.
Шумахер, кој сега има 50 години, и неговиот 36-годишен партнер се венчаа во саботата во познатиот француски крајбрежен град, на церемонија со која требаше да започне тридневната прослава. Двојката избра елегантни темно сини костуми и светло сини вратоврски за нивниот голем ден, и не ја криеја својата среќа од семејството и пријателите.
Свадбата привлече дополнително внимание бидејќи беше снимена од камерите на Sky и платформата Wow за нивната документарна серија „Ralf & Etienne: Wir sagen Ja“, или „Ралф и Етјен: Велиме да“. Серијата има четири епизоди, а последната, посветена на самата свадба, треба да се прикаже деновиве.
Според најавите, документарецот треба да ги прикаже и подготовките за свадбата, вклучувајќи ја и одлуката на Етјен Буске-Касањ да направи фејслифтинг пред церемонијата, иако Ралф наводно не бил сосема воодушевен од идејата.
Шумахер и Етјен имаат куќа во близина на Сен Тропе, па затоа оваа локација беше особено симболична за нивната свадба.
Приватниот живот на Ралф е под микроскоп на јавноста во последните години. Пред неговата врска со Етјен, тој беше во брак со Кора Шумахер, со која се ожени во 2001 година. Нивниот брак траеше 13 години, а заедно имаат и син, Дејвид.
Откако Ралф јавно откри дека е во врска со маж, неговата врска со неговата поранешна сопруга стана исклучително бурна. Кора потоа тврдеше дека ги потрошила најубавите години од својот живот, а во еден момент дури и ја запалила венчаницата. Исто така, јавно го замоли да ја остави на мира за да може да се излечи во мир.
Сепак, по веста за неговиот повторен брак, Кора испрати помирна порака во февруари, велејќи дека таа и нејзиниот нов партнер Стивен Бо Бекендам им посакале на Ралф и Етјен се најдобро и многу среќа.
Ралф Шумахер е помладиот брат на Михаел Шумахер, седумкратниот светски шампион во Формула 1, кој е надвор од јавноста по сериозната несреќа на скијање во 2013 година.
