Словенечкиот судија Славко Винчиќ го доби најголемото признание во својата судиска кариера досега, откако ФИФА го назначи за главен судија на финалето на Светското првенство помеѓу Аргентина и Шпанија.
Кога дозна дека ќе дели правда на најважниот натпревар во светскиот фудбал, 46-годишниот Словенец не можеше да ги скрие своите емоции.
Во видео објавено од ФИФА, може да се види како ја спушта главата, го покрива лицето со рацете и плаче, додека неговите колеги му аплаудираат.
На Винчиќ во финалето ќе му помагаат неговите сонародници Томаж Кланчник и Андраж Ковачиќ, додека Јорданецот Адхам Махадмех ќе биде четвртиот судија.
Финалето помеѓу Аргентина и Шпанија ќе се игра во недела (21 часот) на стадионот „Мет Лајф“ во Њу Џерси.
Винчиќ има богата меѓународна кариера зад себе. Тој го судеше финалето на Лигата на Европа во 2022 година помеѓу Ајнтрахт Франкфурт и Ренџерс, како и финалето на Лигата на шампионите во 2024 година помеѓу Реал Мадрид и Борусија Дортмунд.
Сепак, неговото име сè уште се споменува од многумина денес поради полициската операција „Кристал“, спроведена во мај 2020 година во Бјелина.
За време на големата операција насочена кон разбивање на синџир на организирана проституција, трговија со дрога и нелегално поседување оружје, беа приведени десетици лица.
Тогаш полицијата заплени кокаин, огнено оружје, панцири и повеќе од 10.000 евра во готово.
Меѓу приведените беа Винчиќ, како и српската старлета Тијана Максимовиќ, попозната како Тијана Ајфон.
Според информациите од истрагата во тоа време, словенечкиот судија не бил осомничен, туку бил испрашуван како сведок.
По давањето исказ, тој бил ослободен и против него никогаш не биле поднесени обвиненија.
Неколку месеци по настанот, Винчиќ во интервју за словенечкиот портал 24ur објасни како завршил на спорната локација.
„Освен што сум фудбалски судија, со години имам и своја компанија. Бев на службено патување во Босна и Херцеговина и по средбата прифатив покана што се покажа како најголемата грешка во мојот живот, за која и денес жалам.“
Тој истакна дека не познавал ниту еден од присутните и дека на имотот завршил сосема случајно.
„Имаше околу четириесет луѓе што никогаш порано не сум ги видел. Седев на масата со моите пријатели, вечеравме и разговаравме, кога пристигна полицијата. Бевме испрашувани исклучиво како сведоци. Кога се утврди дека немаме никаква врска со осомничените, бевме ослободени.“
Една година по полициската операција, Тијана Ајфон се изјасни за виновна за кривичното дело меѓународно поттикнување на проституција.
Според обвинението на Обвинителството на БиХ, таа донела две девојки од Србија во Бјелина, каде што на приватна забава давале сексуални услуги за пари. За секоја од нив било договорено по 500 евра.
Тијана Ајфон помина еден месец во притвор, а против Славко Винчиќ не е спроведена никаква постапка, ниту пак е обвинет во врска со случајот.
Денес, шест години подоцна, словенечкиот судија се соочува со најголемиот предизвик во својата кариера – ќе го суди финалето на Светското првенство помеѓу Аргентина и Шпанија.
