Арсенал е многу блиску до титулата во англиското првенство. Тимот на Микел Артета го доби лондонското дерби со Вест Хем со 1:0 на Лондонскиот стадион. Единствениот гол го постигна Леандро Тросар во 83-тата минута.
Во првото полувреме гостите ја погодија стативата и имаа и други шанси, но по паузата „чеканите“ дојдоа до неколку можности, а Матеуш Фернандес пропушти одлична шанса. Во продолжението, голот на резервистот Калум Вилсон беше поништен поради прекршок врз Раја.
Така, „топџиите“ повторно ја зголемија својата предност на пет бода во однос на Манчестер Сити, кој има натпревар помалку.
Денешниот натпревар изгледаше како најтежок за „топџиите“ до крајот на сезоната во шампионатот, бидејќи тимот сè уште има домашен натпревар против испаднатиот Барнли и гостување против Кристал Палас, кој нема за што да игра во Премиер лигата и ќе се концентрира на финалето во Конференциската лига.
Поразот значи дека Вест Хем останува во зоната за испаѓање и еден бод зад Тотенхем, а „петлите“ можат да ја зголемат својата предност ако утре земат бодови дома против Лидс.
