Претседателот на Француската фудбалска федерација, Филип Дијало, неодамна се сретнал со репрезентативците и ги информирал дека нивните бонуси за Светското првенство во Северна Америка ќе бидат намалени, објави „Екип“. Неколку од играчите биле „изненадени од одлуката“.
Според изданието, Дијало објаснил дека наградниот фонд на ФИФА е под очекувањата, курсот на доларот не е поволен, а самото Светско првенство ќе биде многу скапо за федерацијата. Сепак, играчите биле шокирани бидејќи федерацијата има договор со „Најк“, при што компанијата плаќа 100 милиони евра годишно.
„Екип“ објави дека француската федерација се обидува да ги намали трошоците во сите области, вклучително и за националните тимови. Дијало ќе има уште еден состанок со играчите следната недела кога ќе се соберат за почетокот на кампот пред нивното учество на Светското првенство во 2026 година.
