Тешката вечер за Челси се претвори во историски дебакл што долго ќе се памети на „Стемфорд Бриџ“.
Поразот од ПСЖ во осминафиналето на Лигата на шампионите не беше само болен во резултатска смисла; донесе и црн рекорд што лондонскиот клуб никогаш порано не го доживеал. Имено, за прв пат во својата историја, Челси прими дури осум гола во натпреварувачки двомеч.
Вкупниот резултат од двата натпревари против париските гиганти ги остави навивачите во шок и отвори бројни прашања за состојбата на тимот што долго време бараше стабилност.
Она што е особено загрижувачко е начинот на кој Челси изгледаше на теренот. Одбраната изгледаше неизвесно и без вистинска организација, додека играчите на ПСЖ лесно наоѓаа простор и ја казнуваа речиси секоја грешка.
Тренерот Лиам Розениор ќе мора да направи некои сериозни промени бидејќи неговиот тим забележа ист број порази во последните три последователни натпревари. Во 18 натпревари во кои ги водеше „сините“, Розениор собра 10 победи, два нерешени резултати и шест порази.
