Јирген Клоп би можел изненадувачки да се врати на тренерската работа и да ја преземе клупата на Атлетико Мадрид. Барем така тврдат шпанските медиуми, кои наведуваат дека легендарниот германски стручњак е кандидат да го наследи Диего Симеоне.
Клоп го напушти Ливерпул во 2024 година по речиси девет години на клупата на англискиот гигант, а моментално работи како глобален раководител на фудбалот за организацијата Ред Бул.
Според информациите објавени од шпанската емисија „Ел Чирингито“, Германецот веќе е во сериозни разговори за евентуално пристигнување во мадридскиот клуб.
Се наведува дека тој преговара со Марк Роуан, извршен директор на инвестициската компанија Аполо, која е мнозински сопственик на Атлетико. Симеоне ќе влезе во последната година од својот договор на стадионот Ванда Метрополитано ова лето, па затоа се повеќе се зборува за евентуална промена на клупата.
Веста за евентуално пристигнување во Мадрид се појави кратко по шпекулациите дека Клоп не е целосно задоволен од својата улога во Ред Бул. Оливер Гласнер, тренер кој наскоро би можел да го напушти Кристал Палас, се споменува како потенцијален наследник на позицијата.
Ред Бул претходно ги негираше ваквите тврдења и нагласи дека се задоволни од работата на Клоп, но шпанските медиуми сега носат нова приказна што би можела да предизвика голема промена.
Клоп ја започна својата тренерска кариера во Мајнц, кој го водеше од втората лига во Бундеслигата. Вистинска слава стекна во Борусија Дортмунд, со која двапати го освои германското првенство и играше во финалето на Лигата на шампионите.
Од 2015 до крајот на сезоната 2023/24, тој го водеше Ливерпул и освои осум трофеи во тој период. Најважни се титулата во Премиер лигата во 2020 година, прва на клубот по 30 години, и Лигата на шампионите во 2019 година.
Доколку го преземе Атлетико, тоа би бил еден од најголемите тренерски трансфери во последните години.
