Францускиот репрезентативец Ибрахима Конате е на еден чекор од преселба во Реал Мадрид, објавуваат европските медиуми, наведувајќи дека централниот бек на Ливерпул постигнал усмен договор со шпанскиот гигант.
Како што е објавено, Конате ќе го напушти Ливерпул на крајот од сезоната како слободен агент, откако преговорите за продолжување на договорот не дадоа резултати. Договорот на Французинот истекува ова лето, а неколку клубови покажаа интерес за неговите услуги.
Според информациите од познатиот фудбалски инсајдер Фабрицио Романо, веќе постои принципиелен договор помеѓу Конате и Реал Мадрид за четиригодишна соработка.
„Реал Мадрид има усмен договор со Ибрахима Конате. Четиригодишниот договор треба да биде потпишан откако ќе бидат завршени формалностите во клубот. Конате ја стави понудата од Саудиска Арабија на чекање бидејќи негов приоритет е да се пресели во Реал“, објави Романо.
Доколку трансферот се реализира, Конате повторно ќе ја дели соблекувалната со Трент Александар-Арнолд, кој исто така пристигна од Ливерпул минатото лето откако му истече договорот.
Дефанзивецот одигра 183 натпревари во четири сезони на „Енфилд“ и ја освои Премиер лигата, ФА Купот, два Лига купа и Комјунити Шилд.
Иако претходно изрази желба еден ден да игра за Пари Сен Жермен, во моментов нема индикации дека европските шампиони се заинтересирани за неговиот ангажман.
Конате неодамна го објави своето заминување од „Енфилд“ во емотивна порака до навивачите.
„Ви благодарам од дното на моето срце за сè. Ве сакам и ќе го носам Ливерпул со мене каде и да одам. Ова не е лесно збогување, но време е за нов предизвик и ново поглавје во мојата кариера“, рече францускиот фудбалер.
