Новиот технички директор на италијанската фудбалска репрезентација Паоло Малдини ја започна потрагата по нов тренер, а негов прв избор е каталонскиот тренер Пеп Гвардиола, објави вчера „Скај Италија“.
Според италијанските медиуми, Малдини минатиот викенд во Барселона имал состанок со 55-годишниот Гвардиола, кој го напушти Манчестер Сити на крајот од минатата сезона и моментално е невработен. На состанокот учествувал и Леонардо, член на новото техничко раководство на италијанската репрезентација.
„Скај Италија“ наведува дека ова е првиот разговор насочен кон истражување на можноста Каталонецот да ја преземе италијанската репрезентација пред Европското првенство во 2028 година, кое заеднички ќе го организираат Обединетото Кралство и Ирска.
Гвардиола неодамна изјави дека ужива во времето поминато подалеку од фудбалот откако го напушти Манчестер Сити, но Италија има посебно место во неговата кариера. Откако ја напушти Барселона, тој играше за Бреша и Рома, каде што помина две сезони.
Италијанската фудбалска федерација бара нов тренер по разочарувачкиот период обележан со неуспехот на тимот да се квалификува за Светското првенство, а меѓу кандидатите за позицијата се Роберто Манчини и Андреа Пирло. Сепак, според „Скај Италија“, приоритет на Малдини останува Гвардиола.
Италија ќе се натпреварува во Лигата на нации за два месеци, а е во група со Франција, Белгија и Турција.
