Манчестер Сити објави дека од недела, северната трибина на стадионот „Етихад“ ќе го носи името на Пеп Гвардиола, кој ќе го води тимот од клупата за последен пат тој ден, со што ќе го заврши својот десетгодишен мандат во „Граѓаните“.
Новоизградената и проширена северна трибина ќе се вика „Трибина Пеп Гвардиола“ по иницијатива на претседателот на клубот, Халдун Ал Мубарак, а челниците на Сити ја донесоа оваа одлука во чест на легендарниот тренер кој им донесе 20 трофеи.
North Stand to be renamed ‘The Pep Guardiola Stand.' 🩵
Read more 🔗 https://t.co/IcuzmBkVXV pic.twitter.com/SrUqawbHWx
— Manchester City (@ManCity) May 22, 2026
Трибината ќе биде целосно отворена за навивачите за прв пат во недела, на последниот натпревар од сезоната против Астон Вила, што воедно ќе биде и последниот натпревар на Гвардиола на клупата на Сити.
Надградбата на Северната трибина „Етихад“ започна кон крајот на 2023 година, а од недела нејзиниот капацитет ќе биде зголемен за 7.000 нови седишта, зголемувајќи го вкупниот капацитет на стадионот на 61.000 седишта.
„Немам зборови. Халдун ми се јави и ми рече дека клубот ја донел таа одлука. Јас велам, немам зборови. Сакам да чувствувам дека мојата вибрација или мојата енергија ќе биде таму засекогаш. Во лоши времиња, кога некој ќе погледне таму и ќе го види Пеп, ќе ја испратам мојата енергија до тимот и клубот. Тоа е една од најголемите почести што можам да ја добијам. Само сакам да му се заблагодарам на клубот. Мојот татко ќе биде тука во недела, има 94 години и ќе дојде да го гледа натпреварот и неверојатна чест е што неговото презиме е тука. Немам зборови“, рече Гвардиола.
