Честопати во фудбалот се случувало големите таленти да не знаат како да ја контролираат славата што ја стекнуваат, туку да ја користат за да го уништат сопствениот потенцијал и кариера, зграпчувајќи ги само лошите работи што доаѓаат со популарноста и вниманието на медиумите. Еден таков случај е соиграчот на Кристијано Роналдо во португалската репрезентација, Рафаел Леао.
Управата на Милан ја понуди ѕвездата на тимот, Рафаел Леао, на Арсенал, Манчестер Јунајтед и Барселона, но ниту еден од големите клубови не покажа сериозен интерес за таков договор, според медиумите во Италија.
Португалецот беше вмешан во неколку скандали во текот на тековната сезона, а неговиот договор истекува за само две години, па затоа на Сан Сиро одлучија дека сега е вистинското време да се збогуваат. Фудбалерот не покажува знаци дека сака да го продолжи договорот, а по една година неговата цена би била значително пониска.
Леао има откупна клаузула во неговиот тековен договор вредна 120 милиони евра, но „росонерите“ покажаа подготвеност да се разделат со крилниот напаѓач за околу 80-90 милиони евра. И покрај ова, овие финансиски услови им се чинеле претерано високи на сите клубови со кои се одржале состаноци.
Моментално, пореални дестинации за Рафаел Леао се турските гиганти Галатасарај и Фенербахче, кои покажаа сериозна моќ на трансфер пазарот во последните години, но веројатно нема да биде лесна задача да се убеди самиот фудбалер да се пресели таму.
Саудиска Арабија исто така би била потенцијална опција, но сè уште не е јасно дали азиската земја би му се допаднала на крилниот напаѓач.
Патем, Леао, и покрај лошата форма и скандалите, е вклучен во списокот на играчи кои ќе играат за Португалија на претстојното Светско првенство, но големото прашање е колку време за игра ќе добие.
