Висок претставник на американскиот претседател Доналд Трамп предложи Италија да го замени Иран на претстојното Светско првенство во фудбал, се вели во извештај.
Предлогот се смета за дел од напорите за подобрување на затегнатите односи меѓу Трамп и италијанската премиерка Џорџија Мелони по неодамнешната расправија околу критиките на претседателот кон папата Лав XIV за војната со Иран, објави „Фајненшл тајмс“, повикувајќи се на луѓе запознаени со ова прашање.
„Можам да потврдам дека им предложив на Трамп и (претседателот на ФИФА, Џани) Инфантино Италија да го замени Иран на Светското првенство. Роден сум во Италија и би било сон да ги видам „азурите“ (италијанската репрезентација) на турнир организиран од САД. Со четири титули, тие имаат педигре за да го оправдаат своето вклучување“, изјави специјалниот претставник на САД, Паоло Замполи, за „Фајненшл тајмс“.
Во меѓувреме, Иран е целосно подготвен за учество на неговата национална фудбалска репрезентација на Светското првенство во фудбал во 2026 година во САД, изјави портпаролката на владата, Фатемех Мохаџерани, во средата.
Во разговор за државниот радиодифузер IRIB, Мохаџерани рече дека Министерството за млади и спорт ги направило сите потребни подготовки за тимот ефикасно да учествува на турнирот.
ФИФА не коментираше за наводните лобистички напори, но Инфантино минатата недела изјави дека се очекува иранскиот тим да се натпреварува.
„Иранскиот тим доаѓа, тоа е сигурно“, рече тој на конференција во Вашингтон.
Белата куќа и Стејт департментот одбија да коментираат, се вели во извештајот.
