Сезона без трофеј и сè понапната атмосфера во соблекувалната, која кулминираше со физичка пресметка меѓу играчите, го натера раководството на Реал Мадрид да преземе итни мерки. Откако капитенот Федерико Валверде беше хоспитализиран во четврток по судир со соиграчот Аурелиен Чуамени, претседателот Флорентино Перез наводно одлучил дека работите мора драстично да се променат следната сезона.
Планирањето за следната сезона започна откако тимот беше елиминиран од Баерн во четвртфиналето на Лигата на шампионите, а може да се забрза ако Реал загуби од Барселона во недела и со тоа математички ја изгуби шансата да ја освои титулата во лигата. Едно од клучните прашања е тренерското. Алваро Арбелоа, кој ја презеде функцијата од Чаби Алонсо во јануари, не ги оправда очекувањата, а Реал ќе ја заврши оваа сезона без да освои ниту еден трофеј.
Во овој контекст, сè погласно се споменува името на португалскиот стручњак Жозе Мурињо, кој би можел да се врати во Мадрид по 13 години. Шпанскиот весник „Марка“ и познатиот фудбалски инсајдер Фабрицио Романо објавуваат дека преговорите веќе се во тек.
„Реал Мадрид го започна процесот на доведување на Жозе Мурињо и веќе се во тек директни контакти. Бенфика сака да го задржи по секоја цена, но е свесна дека тој преговара со Реал. Конечната одлука за неговото враќање во Мадрид зависи од Флорентино Перез“, напиша Романо.
„Марка“ додава дека неодамнешните настани во клубот ја зајакнале позицијата на Мурињо.
„Настаните од изминатите неколку дена одеднаш ја натежнаа вагата во корист на Мурињо. Португалецот би донел богато искуство во справувањето со чувствителни ситуации, кои ги имал многу во својата долга кариера. Сегашната напната атмосфера во тимот ги зајакнува аргументите на оние кои се залагаат за ангажман на португалскиот тренер, чија предност е и тоа што го познава клубот одвнатре“, вели весникот.
Клубот верува дека тренер од таков профил би можел да внесе ред кај ѕвездите на тимот.
Мурињо ја презеде Бенфика во септември минатата година откако го напушти Фенербахче. Иако не забележа ниту еден пораз во првенството, титулата во португалското првенство му припадна на Порто поради десетте нерешени резултати на неговиот тим во 32 одиграни кола. Во својот прв тригодишен мандат во Реал Мадрид, тој го предводеше клубот во 178 натпревари и го освои шпанското првенство, Кралскиот куп и Шпанскиот суперкуп.
