Поранешниот тренер на Интер, Симоне Инзаги, повторно се дистанцира од можноста да ја преземе италијанската репрезентација. Поранешниот фудбалер беше едно од имињата силно поврзани со можноста да ги преземе „азурите“ по заминувањето на Џенаро Гатузо. Репрезентацијата остана без тренер по поразот од Босна и Херцеговина во баражот за Светското првенство во САД, Мексико и Канада ова лето. Така, Италијанците ќе го пропуштат третото Светско првенство по ред.
„Не ми недостига Италија. Откако пристигнав во Ријад, дома сум вкупно четири дена. Тука сум со моето семејство, моите родители, имам пријатели кои често доаѓаат да ме видат, па не страдам од носталгија. Живеам во затворена заедница и организацијата е совршена, дури и во клубот. Исто така, учам англиски“, рече Инзаги, а тоа веднаш е сфатено како порака дека е заинтересиран да работи во Премиер лигата во иднина.
Симоне Инзаги има уште една година од договорот со Ал-Хилал. Неговиот тим моментално е втор на табелата во лигата на Саудиска Арабија, осум бода зад Ал-Наср на Кристијано Роналдо, но со натпревар помалку.
Името на Инзаги неодамна се поврзуваше со англискиот тим Њукасл, каде што мнозински сопственик е суверен фонд на Саудиска Арабија, кој исто така контролира и поголем дел од локалната лига.
