Аргентинскиот тренер Маурисио Покетино сака да се врати во Премиер лигата и би можел да го стори тоа по завршувањето на Светското првенство, објави „Скај Спортс“. Неговиот договор со Фудбалската федерација на САД истекува по завршувањето на претстојниот турнир во САД, Канада и Мексико.
Покетино беше поврзуван со враќање во Тотенхем, но Спарс одлучија да го назначат Роберто Де Зерби на петгодишен договор. Сепак, ќе има и други слободни места во англиското првенство по завршувањето на тековната сезона.
На прашањето дали сака да се врати во Англија, Покетино за поткастот „Stick To Football“ изјави: „Еден ден, да, бидејќи навистина ми се допаѓа Англија. Мојот профил како личност и професионалец многу одговара на Премиер лигата“.
Слободни места би можеле да има и во Манчестер Јунајтед и Челси. Мајкл Карик е под договор со „црвените ѓаволи“ до крајот на сезоната, а „сините“ ги предводи Калум Мекфарлан по отпуштањето на Лиам Росениор.
