Италијанската фудбалска репрезентација стана синоним за пад на спортските сили, откако четирикратниот светски шампион во фудбал си дозволи три пати по ред да го пропушти Светското првенство. Најновиот пораз од Босна и Херцеговина во баражот само додаде сол на отворената рана на фановите на овој спорт на Апенините…
Неговите поранешни протагонисти уште повеќе, бидејќи знаат какво било во нивно време. И тешко им е да го прифатат фактот дека работите отишле толку далеку во спротивна насока што никој повеќе не се плаши од „азурите“, дури ни „малата“ Босна – нивниот „џелат“ на крајот од квалификациите за натпреварувањето во САД, Мексико и Канада.
„Последната Италија на Светското првенство што ја паметам… беа воини. Решителни, фокусирани, посветени. Немаше никаков дефокус, немаше опсесија со имиџот, немаше потреба да се живее на социјалните медиуми. Само фудбал, само гордост, само одговорност за дресот што го носите“, отворено зборува легендарниот Франческо Тоти за проблемот.
Италија беше планетарна сила точно две децении, но потоа работите драстично се променија. На полошо.
„Тој тим беше како Римјаните низ историјата: дисциплиниран, бестрашен и почитуван. Тоа беше времето кога Италија беше вистинска Италија. А денес… Ме боли да кажам дека Италија го изгуби својот идентитет. Премногу играчи се лежерни, премногу расеани од славата, тетоважите, начинот на живот на „славните“. Фокусот исчезна, гладот исчезна. Сега се соочуваме со најголемиот срам – пропуштање на Светското првенство трет пат по ред. За нација како Италија, ова не е само неуспех… тоа е понижување. Само талентот никогаш не е доволен. Без менталитет, без дисциплина, без гордост… немате ништо“, искрено изјави човекот кој ја помина целата своја клупска кариера во Рома.
