Фудбалерот од средниот ред на Манчестер Јунајтед, Мануел Угарте, е успешно опериран откако ги скина вкрстените лигаменти на коленото, објави клубот.
Фудбалерот од средниот ред ја претрпе повредата додека играше за Уругвај на Светското првенство, каде што Уругвајците беа елиминирани во групната фаза по разочарувачкиот настап. Угарте сега ќе го започне своето закрепнување и рехабилитација под надзор на медицинскиот тим на „Црвените ѓаволи“. Се очекува да биде надвор од теренот помеѓу шест и осум месеци.
On the comeback trail.
Wishing you all the best with your recovery, @ManuUgarte8 — we'll be with you every step of the way 🙏❤️
— Manchester United (@ManUtd) July 15, 2026
Уругвајецот се приклучи на „Олд Трафорд“ во летото 2024 година за 50 милиони евра од ПСЖ, но не успеа да се етаблира во тимот на Манчестер Јунајтед. Тој беше на клупата и ретко се појавуваше за клубот минатата сезона под водство на Рубен Аморим и Мајкл Карик.
Локалните медиуми тврдеа дека плановите на англискиот тим биле да се разделат со играчот, но со оглед на моменталната ситуација, тој сигурно ќе остане во тимот барем до зима.
