Леброн Џејмс влегува во лето кое ќе го дефинира самиот крај на неговата неверојатна кариера. Иако интересот за човекот што ја промени историјата на НБА лигата сè уште постои, сè повеќе се чини дека прашањето не е кој го сака Леброн, туку кој може да го привлече.
Според информациите од Марк Штајн, пазарот за 41-годишната суперѕвезда би можел да биде изненадувачки ограничен. Неколку големи франшизи ја следат ситуацијата, но речиси сите имаат сериозни финансиски или натпреварувачки пречки.
Први на листата се Голден Стејт Вориорс, тим кој со години покажува интерес за Леброн. Идејата Стеф Кари и Џејмс конечно да играат заедно долго време изгледаше како фантазија на навивачите, но проблемот се парите. Вориорс се сериозно ограничени кога станува збор за буџетски простор и тешко можат да понудат договор што би имал смисла за двете страни.
Се споменува и Кливленд, местото каде што Леброн остави најдлабок белег и ја донесе единствената титула во историјата на франшизата во 2016 година. Штајн вели дека Кавс претходно не биле премногу заинтересирани за уште еден камбек, но евентуален нов неуспех во плејофот би можел да го промени размислувањето на раководството. Сепак, прашањето е колку трет мандат за Леброн во Охајо би бил емотивна приказна, а колку вистинско кошаркарско решение.
Њујорк Никс се, исто така, на листата. Леброн никогаш не криел колку го сака Медисон Сквер Гарден и целиот њујоршки спектакл, но моментот изгледа незгоден. Никс моментално имаат стабилно јадро, играат во големото финале на Истокот и нема многу причини да се прекине постоечката хемија за играч кој влегува во последните фази од својата кариера.
Можеби најинтересната опција се Лос Анџелес Клиперс. Леброн не би морал да менува градови, би играл за Тајрон Лу, тренерот со кого ја освои титулата во Кливленд, но големото прашање останува колку се сериозни Клиперс како кандидат за шампионска титула. Ако целта не е само проштална турнеја, туку вистинска борба за прстен, тешко е да се видат Клиперси во тоа друштво во моментов.
Поради сето ова, сценариото во кое Леброн останува во Лос Анџелес Лејкерс изгледа пореално отколку што многумина сакаат да признаат. Друга опција што сè повеќе лебди над целата приказна е пензионирањето.
Според информациите на Штајн, луѓето во лигата веруваат дека е многу поверојатно Леброн да игра само уште една сезона отколку да ја продолжи кариерата за неколку години. Со други зборови, НБА многу брзо би можела да влезе во сезоната на збогување на еден од најголемите играчи на сите времиња.
Ситуацијата би можела целосно да го промени размислувањето на Џејмс и можната одлука да игра следната сезона на минимум како ветеран. Во тој случај, Кралот би можел да потпише договор со буквално која било франшиза и на тој начин да ја пронајде најдобрата ситуација.
И како што годините минуваат неумоливо, Леброн продолжува да пркоси на логиката. Оваа сезона тој забележа 20,9 поени, 7,2 асистенции и 6,1 скока со 51,5% шут од поле. Тоа е неговиот најнизок просек на поени од неговата дебитантска година, но она што го прави на 41 година никогаш порано не е видено во НБА.
Она што е особено импресивно е тоа што тој сè уште е способен да однесе сериозен тим во плејофот. И покрај проблемите на Лука Дончиќ и повредите на Остин Ривс, Леброн покажа дека сè уште може да биде централна фигура на тим кој сака резултати.
Сепак, времето ги „гази“ дури и најголемите. Затоа ова лето не е само за трансфери, туку и за прашањето како ќе изгледа последното поглавје од кариерата на човекот кој е лицето на НБА повеќе од две децении.
