Лука Дончиќ наскоро ќе се врати во Љубљана, но пред да го напушти Лос Анџелес, тој имал важен состанок со челниците на Лејкерси и спортскиот оддел на клубот.
Според словенечкото издание на „Спортклуб“, главната тема на разговорот бил планот за летото, закрепнувањето од повредата и подготовката за следната НБА сезона.
Лејкерси сакаат Дончиќ да биде целосно подготвен за својата деветта сезона во НБА на есен, поради што фокусот ова лето ќе биде исклучиво на рехабилитација и физичка подготовка.
Словенечката суперѕвезда прво ќе го заврши закрепнувањето од повредата на тетивата, а потоа постепено ќе работи на враќање на формата пред сезоната 2026/27.
За разлика од претходните години, Дончиќ нема да игра за словенечката репрезентација ова лето. Во претходните пет лета, тој одигра дури 39 официјални натпревари за репрезентацијата, но сега е одлучено дека приоритет ќе биде целосно закрепнување од повредата.
Дончиќ одигра 64 натпревари минатата сезона, што е негов трет најмал број настапи откако влезе во НБА во 2018 година.
Исто така, ова е прв пат во неговата кариера да заврши сезона повреден. Тој е надвор од терените од 2 април поради истегнување на тетивата од втор степен, а повредата се покажа како посериозна отколку што првично се сметаше.
Без него, Лејкерси подоцна беа елиминирани во втората рунда од плејофот од Оклахома Сити Тандер со чисти 4:0.
