Кошаркарскиот тим Маџари синоќа триумфираше против ТФТ со 71:69 и обезбеди место во големото финале на „МТЕЛ“ Супер лигата.
Пред преполна сала во Маџари, дебитантот во најсилното клупско натпреварување во возбудлив и интересен натпревар успеа да ја затвори серијата со 2:0 и да избегне мајсторка.
Клучниот момент се случи на 2.3 секунди пред крајот, при водство на Маџари од 71:69, кога Ташовски беше фаулиран во обидот за три поени. Но репрезентативниот бек, изненадувачки, не реализира ниту едно од нив.
Луис реализираше 24поени, шест скока и три асистенции за Маџари, го следеше Амстронг кој додаде уште 18 поени, осум скока и три асистенции.
Кај ТФТ Ташовски, кој се претвори во трагичар, застана на бројката од 24 поени, Гордон ја заврши сезоната со 13 поени и шест скока), а Говенс имаше 11 поени и седум асистенции.
Вториот финалист ќе биде познат вечерва, кога од 19 часот, во СЦ „Јане Сандански“, екипите на МЗТ Скопје Аеродром и Пелистер ќе го одиграат третиот меч од втората полуфинална серија во која моменталниот резултат е 1-1.
