Кошаркарскиот клуб Панатинаикос сè уште чека одговор од Евролигата, откако таа достави видео снимки од контроверзни судиски одлуки од плејоф серијата против Валенсија до раководителите на натпреварувањето.
Сопственикот на атинскиот клуб, Димитрис Јанакопулос, потврди дека Евролигата сè уште не одговорила на официјалното барање за анализа.
„Панатинаикос, во согласност со правилата, испрати комплетен видео материјал со ситуации што ги сметаме за контроверзни од натпреварите против Валенсија. До денес, не добивме никаков одговор. Во толку важна серија, целосната транспарентност и отстранувањето на секаков сомнеж мора да бидат приоритет“, рече Јанакопулос.
Серијата е нерешена 2:2, а решавачкиот петти натпревар ќе се игра во Шпанија и ќе го даде одговорот на прашањето кој ќе се квалификува за завршниот турнир на Евролигата.
Јанакопулос, исто така, се осврна на шпекулациите за наводни технички проблеми во салата во Атина, која е кандидат за домаќин на Фајналфорот.
„Нема проблем со салата. Десетици милиони евра приватни пари се инвестирани за објектот да стане еден од најдобрите во Европа. Фајналфорот во Атина ќе биде најдобро организираниот и најимпресивниот настан во историјата на европската кошарка, без оглед на тоа кои екипи учествуваат“, рече првиот човек на Панатинаикос.
Конечно, тој ги повика играчите и тренерскиот персонал да останат фокусирани исклучиво на теренот.
„Валенсија беше пречекана на највисоко ниво во Атина, и очекуваме ист третман кога ќе пристигнеме во Шпанија“, заклучи Јанакопулос.
