Никола Јокиќ уште еднаш покажа зошто многумина го сметаат за еден од најдобрите кошаркари на денешницата. Српскиот центар ги предводеше Денвер Нагетс до убедлива победа од 129:93 над Хјустон Рокетс, пишувајќи нова страница во историјата на НБА.
Во тој натпревар, Јокиќ го забележа својот 25-ти „трипл-дабл“ во сезоната, станувајќи првиот играч во историјата на НБА што забележал најмалку 25 „трипл-дабл“ учиноци во четири последователни сезони.
Веднаш по натпреварот, НБА објави на социјалните мрежи колку е посебен овој подвиг.
„Историја за Јокиќ. Во вечерашната победа, Никола Јокиќ го забележа својот 25-ти „трипл-дабл“ во сезоната. Тој сега има четири последователни сезони со 25 или повеќе „трипл-дабл“ и стана првиот играч во историјата на НБА што ја достигна таа пресвртница“, објави НБА.
Во соопштението, тие додадоа симбол на џокер на пораката, алудирајќи на прекарот на српскиот кошаркар кој со години доминира во најсилната кошаркарска лига во светот.
