Најтрофејниот српски тренер Жељко Обрадовиќ ги сподели своите впечатоци од досегашната работа во Панатинаикос, каде што во вторник го водеше првиот тренинг во новата сезона.
Моментално, популарниот Жоц не може да смета на голем број играчи, но, како што вели, е задоволен од тоа како одат работите.
„Ни недостасуваат седум играчи кои имаат обврски со репрезентацијата плус Нан го има тој проблем (операција на коленото). Почнавме со подготовките, имаме некои играчи кои ни помагаат и сè е во ред. Работиме нормално. Чекаме следната недела кога сите ќе бидеме заедно и ќе се подготвиме за сезоната со полн состав“.
ПАО ќе биде фаворит на сите фронтови следната сезона и сите во тимот се совршено свесни за тоа.
„Сите се свесни за квалитетот на играчите што ги имаме, но поентата е во тимот. За жал, немаме многу денови за заедничка работа, но никогаш нема да се жалам за тоа. Веќе разговарав со тренерскиот штаб и со играчите и очекувањата се навистина високи. Тоа ми е логично и нашата цел треба да биде да имаме единство во тешки моменти. Сезоната е долга, а работата на дневна основа ќе биде многу важна. Тука има играчи кои веќе разбираат како треба да се игра кошарка, поради нивниот квалитет.“
Навивачите се особено среќни затоа што на Обрадовиќ му помагаат во работата неговите поранешни играчи и клупски легенди. Токму овој детаљ, оваа култура на Панатинаикос, го доживува српскиот тренер на посебен начин.
„Задоволен сум од досегашната работа. Ова е наш дом и тоа е многу позитивна работа. Сите мора да можеме да им помогнеме на играчите. Сакам моите играчи да размислуваат само за кошарка. Ова е нашата работа. Имаме некои луѓе тука кои работеле во минатото. Фраги (Алвертис) е тука, Дијамантидис е тука, Мајк (Батист) е тука, имам некои играчи со кои веќе сме работеле. Тоа е многу корисно за нас. Културата на Панатинаикос е нешто посебно. Мора повторно да станеме тим каде што сите разбираат што е Панатинаикос, што значи Панатинаикос. Да бидеме во сите области од животот, не само во кошарката. Мора да бидеме на потребното ниво.“
