Екипата на Еурофарм Пелистер ги заврши домашните натпревари во Лигата на шампионите со голем бод против ПСЖ (34:34). На тимот на Стевче Алушовски му тргна на почетокот на 2026 година, а по бод во Данска, следеше нерешено со фаворитите од Париз.
Ова секако претставува добра претходница за дербито со Вардар.
„Ова беше феноменален натпревар. Можам само да им честитам на ракометарите. Покажавме одличен карактер и кога губевме со два гола разлика само минута и пол до крајот, верувавме во себе и се вративме. Бевме нервозни на почетокот, правевме грешки, кои според мене не се грешки туку глупави работи, но кога играте против ПСЖ и во ваква атмосфера, нормално е да нема фокус. Сепак, мислам дека тимот расте од ден на ден, почнуваме да веруваме во она што го правиме и во нашиот систем. Голема благодарност до битолчани, беше задоволство да го водам овој тим од клупата“, рече тренерот, кој потоа го пофали капитенот Кузмановски.
„Имаме квалитет, загрижен сум за ситуацијата со новото засилување Граховац. Тој е клучен ракометар во ротацијата. Вечерва Филип Кузмановски играше со треска, во текот на денот имаше 39 температура. Ќе видиме утре каква ќе биде ситуацијата, бидејќи нè очекуваат важни натпревари во Купот на Македонија“, рече Алушовски.
