Значаен чекор напред за иднината на регионалниот ракомет беше направен денес во Подгорица со потпишување на Договорот за формирање регионални лиги во машка и женска конкуренција. Договорот го потпишаа ракометните федерации на Црна Гора, Србија и Македонија, со што се потврдува нивната заедничка посветеност на зајакнување на квалитетот на натпреварувањето, развој на играчи и подобрување на целокупната ракометна средина во регионот, соопшти РТЦГ.
Регионалната машка лига ќе собере 10 клуба – по четири од Србија и Македонија и два од Црна Гора, додека регионалната женска лига ќе има 10 клуба од пет земји во регионот: Црна Гора, Србија, Македонија, Хрватска и Словенија, со по двајца претставници од секоја земја.
Овој проект претставува важен чекор кон создавање поквалитетен и поконкурентен систем на натпреварување, кој ќе им овозможи на клубовите да играат поголем број силни натпревари, дополнително да развиваат млади играчи и тренери, да ја зголемат медиумската видливост, како и посилен комерцијален потенцијал за ракометот низ целиот регион.
Овој проект е особено вреден бидејќи е заедничка иницијатива на федерациите и клубовите, заснована на партнерство, меѓусебна доверба и заедничка визија за развој на ракометот во Југоисточна Европа.
Потписниците на Договорот изразија верување дека регионалните лиги ќе донесат нов квалитет, дополнителна привлечност за навивачите и спонзорите уште од првите сезони, но исто така претставуваат силен поттик за понатамошен развој на ракометот во сите земји учеснички.
Во наредниот период ќе се формира заедничка канцеларија на лигата, ќе се дефинираат сите модели на натпреварување и организација, како и календарот за почеток на натпреварите.
Денес се означува почетокот на ново и амбициозно поглавје во регионалниот ракомет, со јасна цел – создавање модерно, стабилно и висококвалитетно регионално натпреварување кое ќе биде гордост на сите учесници и на целиот европски ракомет, додава РТЦГ.
