Повеќе од три години по продажбата на Челси, сè уште е нејасно што ќе се случи со 2,5 милијарди фунти што Роман Абрамович ги доби за лондонскиот клуб. Парите сè уште се замрзнати на сметка во Велика Британија, а спорот меѓу рускиот милијардер и британската влада сега се заканува да ескалира во сериозна правна битка.
Абрамович тврди дека парите сè уште му припаѓаат нему и дека мора да има право да одлучува како ќе се трошат, додека британските власти инсистираат средствата да се користат за помош на Украина.
Парите сè уште се замрзнати по продажбата на клубот
Велика Британија и Европската унија воведоа санкции врз Роман Абрамович во 2022 година по почетокот на руската инвазија на Украина, наведувајќи ги неговите врски со рускиот претседател Владимир Путин. Како резултат на тоа, рускиот милијардер беше принуден да го продаде Челси, кој на крајот беше купен од конзорциум предводен од американскиот бизнисмен Тод Боели.
Сепак, парите од продажбата на клубот, во вкупен износ од 2,5 милијарди фунти, остануваат замрзнати на банкарска сметка во Велика Британија, бидејќи сè уште не е постигнат договор за тоа како ќе се користат.
Британската влада сака средствата строго да бидат наменети за помош на Украина, во согласност со поширокиот европски притисок врз Русија да ги сноси трошоците за уништувањето предизвикано од војната.
Абрамович сака поголема слобода во распределбата на парите
Кога објави дека го продава Челси во март 2022 година, Абрамович рече дека парите ќе бидат искористени „во корист на сите жртви на војната во Украина“. Сепак, таа формулација остава можност дел од средствата да бидат наменети и за руските граѓани погодени од војната.
Неговите адвокати од адвокатската канцеларија „Kobre & Kim“ рекоа дека парите сè уште се целосно во сопственост на „Fordstam Ltd“, преку која Абрамович го финансираше Челси со години.
Во писмо испратено пред рокот утврден од британската влада за 17 март, адвокатите ги обвинија министрите дека даваат политички обоени и медиумски експонирани изјави за рускиот милијардер.
„Британската влада очигледно ја третира оваа донација како форма на казнена мерка против г-дин Абрамович“, се вели во писмото, објавено од Ројтерс.
Британска влада: Времето истекува
Британската министерка за внатрешни работи, Ивет Купер, реагираше на обвинувањата, велејќи дека парите за помош на Украина биле ветени пред повеќе од три години.
„Време е Роман Абрамович да го стори она што е исправно. Ако не го стори тоа, ние ќе дејствуваме“, рече Купер.
Минатата година, британската влада го предупреди Абрамович дека мора да ги ослободи средствата или спорот може да заврши на суд.
Премиерот Кир Стармер, исто така, предупреди во декември дека времето истекува за постигнување договор.
Адвокатите на Абрамович велат дека британската влада може да се соочи со долготрајна правна битка ако парите бидат запленети.
Според нив, Абрамович ја смислил идејата да ги донира парите за хуманитарни цели дури и пред да бидат воведени санкциите, и тврдат дека тој останува решен средствата да се користат за добротворни цели.
