Британскиот тенисер Џек Дрејпер го ангажираше Енди Мареј како член на својот тренерски штаб за сезоната на трева, откако се раздели со тренерот Џејми Делгадо, објавија британските медиуми.
Трикратниот Гренд слем шампион, Мареј, не е вклучен во АТП турнејата од минатата година, кога го заврши шестмесечното партнерство со Новак Ѓоковиќ.
Мареј (38) ќе биде во тимот на Дрејпер во текот на целата сезона на трева, вклучувајќи го и Вимблдон, кој започнува на 29 јуни.
„Многу сум благодарен за сè што Џејми Делгадо направи за мене во текот на изминатите шест месеци. Тој е тренер од светска класа и одличен човек“, рече Дрејпер, објави Би-Би-Си.
„Во меѓувреме, ќе продолжам да работам со одличниот тим на ЛТА, со додавањето на Енди Мареј, кој ќе ме поддржува во текот на целата сезона на трева“, додаде британскиот тенисер.
Дрејпер (24) ќе го пропушти годинашниот Ролан Гарос поради проблеми со коленото.
