Српскиот тенисер Новак Ѓоковиќ по поразот од Британецот Џек Дрејпер во осминафиналето на Мастерсот во Индијан Велс изјави дека натпреварот бил решен со еден поен.
Ѓоковиќ не успеа да се пласира во четвртфиналето на Индијан Велс откако загуби од Дрејпер со 2-1, во сетови 6-4, 4-6, 6-7.
Овој натпревар беше обележан со одличен поен во првиот гем од третиот сет. На 30-30, Ѓоковиќ го освои поенот по 26 размени и тој поен веројатно ќе биде еден од најдобрите оваа година, но, според српскиот тенисер, тоа го чинеше на крајот.
„Еден поен. Да, еден поен. Беше одлично да се освои тој поен во тој гем, но бев целосно без енергија. Почнав да се чувствувам подобро дури кон крајот на третиот сет“, рече Ѓоковиќ на прес-конференцијата по натпреварот.
Водејќи со 5-4, Британецот сервираше за натпреварот, но Ѓоковиќ успеа да го врати брејкот, по што сетот отиде во одлучувачки тајбрејк кој му припадна на Дрејпер со 7-5.
„Одиграв слабо на 5-4, ја добив поддршката од публиката и ја почувствував енергијата. Беше како, можеби ќе го добијам ова. Беше толку блиску, толку блиску. Мислам, само неколку несреќни грешки од моја страна. Тајбрејкот, водејќи со 4-3, 5-5, исто така. Тоа е тенис“, рече Ѓоковиќ.
Ѓоковиќ беше прашан и како го оценува својот настап на овој турнир.
„Горчливо е чувството во моментов да се изгуби ваков натпревар, но горд сум на себе што се борев и навистина дадов сè од себе на теренот. Тоа е сигурно. Тоа е она што ќе го издвојам, фактот што не се предадов. Изгубив од одличен играч и беше навистина изедначен дуел во текот на овие два и пол часа. Но да, малку сум разочаран, секако. Жалам што можев подобро, но беше добра борба“, заклучи Ѓоковиќ.
