Германскиот тенисер Александар Зверев, кој неодамна наполни 29 години, денес го освои Ролан Гарос и својата прва Гренд слем титула во кариерата, со што влезе во кругот на „бесмртните“. Третиот тенисер во светот го победи Италијанецот Флавио Коболи (АТП, 14) со 3:2 во големото финале во „Филип Шатрие“ по голема борба и драма, во сетови: 6:1, 4:6, 6:4, 6:7, 6:1 за четири часа и 16 минути одличен тенис.
Ова беше четврта среќа за Германецот. Во претходните три Гренд слем финалиња, тој беше запрен од Доминик Тим (УС Опен 2020), Карлос Алкараз (Ролан Гарос, 2024) и Јаник Синер (2025). Но, ова финале беше различно, ги немаше најдобрите играчи (Алкараз, Синер, Ѓоковиќ…) и тој мораше да ја искористи оваа шанса. Во натпреварот „сега или никогаш“, тој покажа дека е сè уште еден од најдобрите тенисери денес. Денешниот успех дефинитивно му отвора нови врати.
Самото финале понуди спектакл и драма. Првиот сет му припадна целосно на Зверев, кој славеше со три брејка, 6:1. Но, во вториот, Италијанецот ги покажа забите, еден брејк му беше доволен за да израмни во сетовите. Зверев поведе со 2:1 по брејкот во десеттиот гем од третиот сет.
Во четвртиот сет, Коболи имаше брејк предност, но Германецот имаше одговор. Го израмни резултатот на 3:3, а потоа раката на Саша повторно затрепери. Коболи направи уште еден брејк, што го потврди за 5:3. Во продолжение, 24-годишниот Италијанец сервираше за сет, но Зверев спектакуларно направи брејк за 5:5. Потоа Германецот сервираше безбедно за 6:5 и дојде до гемот од соништата, но Коболи го доби тајбрејкот во кој одигра брилијантно и со фантастична паралела за 7:5 го освои петтиот сет за целосен делириум врз Шатрие.
Иако моментумот беше на страната на Италијанецот, Зверев покажа дека е подготвен да испише историја. Веднаш направи два брејка за големи 3:0, а кога сервираше за 4:0 и спаси три брејк топки, на сите им беше јасно дека Саша е на чекор до својот сон. На крајот 6:1 и голема прослава на Александар Зверев кој го симна проклетството наречено Гренд слем.
Така заврши сензационалниот Ролан Гарос кој роди нов Гренд слем шампион.
