Јаник Синер со голема почит зборуваше за Новак Ѓоковиќ пред нивниот нов судир во полуфиналето на Вимблдон, кој е закажан за денес околу 17:00 часот.
Италијанецот нагласува дека ниеден дуел со српскиот ас не е ист и дека секој детаљ ќе биде важен на трева.
„Ќе видиме. Тој имаше тежок натпревар. Секој натпревар што го имавме е различен. Дури и кога ја имав таа мала низа победи против него, имав впечаток дека секој натпревар има своја посебна приказна. Особено кога играте на ваква подлога. Ако имате лош ден на сервис или не ја чувствувате добро топката, ќе биде многу, многу тешко“, рече Синер.
Светскиот број еден е задоволен што повторно е меѓу најдобрите четири на Вимблдон и нагласува дека ќе се обиде да го даде својот максимум.
„Како и да е, среќен сум што повторно сум во полуфиналето. Среќен сум што ќе се борам за секоја топка, а потоа ќе видиме што ќе се случи. Не можам да направам повеќе од тоа. Новак го освои овој турнир многу пати и точно знае како да му пристапи. Со нетрпение го очекувам тој натпревар“, додаде Синер.
Синер зборуваше и за својот настап досега на турнирот, особено за неговиот сервис, кој беше едно од неговите најсилни оружја.
„Мислам дека сервирав добро во важните моменти. Денес се чувствував како да сервирав многу паметно, дури и кога имав предност во брејкот. Во вториот сет, повторно имав мал пад на концентрацијата, но се обидов да останам ментално присутен во секој сервис гем. Задоволен сум од начинот на кој се справив со важните моменти, бидејќи кога ќе го изгубите вториот сет, сè може повторно да се комплицира. Против големите сервери, имате помала контрола. Тоа е нешто на што можам да бидам горд“, додаде Италијанецот.
