Менаџерот на четирикратниот светски шампион во Формула 1, Макс Верстапен – Рејмонд Вермелен, коментираше за иднината на својот клиент за германското издание „Спорт Билд“.
Вермелен, секако, се осврна на дискусијата околу договорот на Верстапен со Ред Бул, кој беше потпишан на почетокот на 2022 година и важи до крајот на сезоната 2028 година. Според Вермелен, неговиот клиент би сакал да ја заврши кариерата со „биковите“, но тоа зависи од одредени услови. Тој додаде и дека е можно да има јасност околу иднината на Верстапен во Формула 1 пред летната пауза, која ќе започне на крајот на јули.
„Нашиот договор е до крајот на 2028 година. Секако, договорот има клаузули за раскинување, но досега не сме морале да ги користиме. Сакаме наскоро да ја донесеме нашата одлука за да бидат сите свесни за ситуацијата, можеби дури и пред летната пауза. Би сакале да продолжиме со Ред Бул и Макс да ја заврши неговата кариера таму, но тој секогаш треба да има шанса да се бори за победи“, рече Вермелен.
