Македонската ракометна репрезентација успешно го започна квалификацискиот циклус за Европското првенство во 2028 година. Избраниците на Кирил Лазаров вечерва во Скопје го совладаа Луксембург со убедливи 41-23, најавувајќи дека сериозно ќе се борат за место на континенталниот собир.
Домашните ракометари уште од почетокот ја презедоа контролата врз натпреварот и не му дозволија на противникот да се надева на изненадување. Македонија на полувремето имаше двојно повеќе голови од Луксембург, водеше со 20-10, а во продолжението дополнително ја зголеми предноста.
Костески постигна шест гола , а Петковски и Серафимов со по пет. Новиот репрезентативец, Горига, се истакна со три погодоци.
Победата е важна не само поради освоените бодови, туку и поради самодовербата што ја носи пред следниот предизвик. Во групата 8, покрај Луксембург, се наоѓаат и селекциите на Шведска и Грција, па секој добар резултат може да има значење во трката за пласман.
За Македонија ова е и продолжување на позитивната традиција против Луксембург. Нашата репрезентација ги доби и претходните шест меѓусебни дуели, а вечерва ја потврди фаворитската улога со уште една убедлива претстава.
Следниот натпревар од квалификациите македонските ракометари ќе го одиграат в недела, кога ќе гостуваат кај Грција во Халкида. Тој дуел ќе биде значително поголем тест за избраниците на Лазаров и можност да го потврдат добриот старт на патот кон Европското првенство во Шпанија, Португалија и Швајцарија.
