Елиминацијата на Португалија од Шпанија во осминафиналето на Светското првенство беше тешка за Рикардо Кварезма. Поранешниот португалски репрезентативец, кој го следи турнирот како коментатор, остро го нападна настапот на својот тим.
„Сите велеа дека ова е најдобрата генерација во историјата на Португалија. Во која смисла е најдобра? Што освоиле? Се враќаме дома со спуштени глави. Имаме одлични играчи во средниот ред, многу талент, но на ова Светско првенство беа многу, многу млаки. Истото важеше и за нападот, а одбраната изгледаше изгубена. Подобро да престанам, инаку ќе кажам работи за кои подоцна ќе се каам“, ја започна својата анализа за поранешниот играч со 80 настапи за Португалија.
„Ништо не функционираше, од почеток до крај. Сè тргна наопаку. И ја подаривме победата на Шпанија, правеа што сакаа. Се шетавме по теренот, бевме бавни, без никаква волја“, додаде Кварезма, кој беше особено критичен кон сега веќе поранешниот селектор Роберто Мартинез.
Да потсетиме дека по овој пораз, Кристијано Роналдо објави дека повеќе нема да учествува на Светското првенство, а каква ќе биде неговата иднина во репрезентацијата ќе видиме.
