Tренерот на Реал Мадрид, Алваро Арбелоа, беше многу среќен по победата од 3-0 над Манчестер Сити. И покрај проблемите со играчкиот кадар, кралскиот клуб постигна убедлив успех во првиот натпревар од осминафиналето на Лигата на шампионите и е блиску до квалификација во следната фаза од турнирот.
„Сè помина подобро отколку што очекувавме. Мило ми е што „Бернабеу“ и играчите почувствуваа задоволство. Го заслужија тоа по сè низ што поминаа. Јасно е дека надвор од клубот добивме сигнали на недоверба кон тимот, но ние сме Реал Мадрид и никогаш не треба да бидеме отпишани“, нагласи Арбелоа.
„Добро знаевме како игра Манчестер Сити и што бара Пеп. Ги затворивме просторите и ги скративме линиите за додавање. Тие се обидуваат да ве повлечат назад, а потоа ве удираат од контранапад, но ние бевме трпеливи и знаевме како да удриме од контранапад“, објасни поранешниот дефанзивец.
„Валверде за мене е Хуанито на 21 век. Вистински репер. Феде отелотворува сè што треба да биде еден играч на Реал Мадрид“, рече Арбелоа, осврнувајќи се на авторот на хет-трикот против „граѓаните“.
Тренерот на Реал Мадрид, исто така, коментираше за промашениот пенал на Винисиус Жуниор.
„Ми се допадна како стадионот му аплаудираше на Винисиус. Ако некој може да стане по удар, тоа е тој. Сè уште не сме во четвртфиналето. Им реков на играчите: ова не е крајот. Знаеме каков тим е Манчестер Сити и каков одличен тренер е Гвардиола. Убеден сум дека ќе се обиде да нè изненади во реваншот.“, додаде тој.
