Аурелио Де Лаурентис и Антонио Конте официјално ја потврдија својата разделба по заедничкиот состанок и крајот на сезоната во Серија А. На стадионот „Диего Армандо Марадона“, две клучни личности во Наполи се појавија заедно пред прес-конференцијата синоќа и практично го потврдија крајот на една ера.
Прв проговори Де Лаурентис, потсетувајќи на заедничкиот период и спомените, но и на тешкотиите што ја придружуваа работата:
„Една вечер Конте имаше момент на големо разочарување и можеби тогаш помисли дека во град кој очекува премногу не може да прави чуда. Му реков да земе една недела одмор, да се смири и да остане дома. По еден месец ми се јави и ме замоли да ме види… и тогаш сфатив. Искрено му реков: ако Наполи стана премногу тежок за тебе, ќе разберам. Ние не сме Баерн, ПСЖ или Реал Мадрид, мора да живееме во рамките на буџетот.“
Во продолжение, Конте официјално го потврди своето заминување и проговори за причините за разделбата.
„Не сакав ништо да знам за идниот проект кога го поканив Де Лаурентис. Поради нашето пријателство, чувствував дека моето патување тука завршува. Одлуката беше моја. Не бев во можност да внесам компактност во тимот. А без тоа, не можете да победите. Чувствував многу напнатост и отров во околината. Наполи мора да има луѓе кои се целосно посветени на клубот.“
Тој додаде дека не жали, но дека се чувствува уморен по две години работа:
„Две години ми одзедоа многу енергија, иако постигнавме нешто историско, како во времето на Марадона. Најдобриот момент беше освојувањето на титулата и славењето, незаборавно искуство. Најтешкиот момент беше Болоња, кога се плашев дека сè ќе се распадне“, објасни Конте.
На крајот, и претседателот и тренерот се согласија дека зад нив е период што ќе се памети како важен дел од модерната историја на Наполи, и покрај разделбата.
