Месут Озил стана неочекуван сојузник на Русија, а украинските медиуми сега објавуваат дека е додаден во базата на податоци „Миротворец“. Поранешната ѕвезда на Реал Мадрид и Арсенал официјално е означена како непријател на Украина.
Германецот со турско потекло е ставен на црната листа откако апелираше до ФИФА да се однесува подеднакво кон сите клубови. Поранешниот репрезентативец на „панцирите“ го обвини управното тело на светскиот фудбал за примена на двојни стандарди.
– Фудбалот отсекогаш носел мир. Кога ќе ги оставите настрана прашањата за раса или религија, спортската заедница отсекогаш ги обединувала луѓето. Како што знаете, ФИФА не воведе ембарго врз израелските тимови, додека тоа не беше случај за руските – започна Озил и додаде:
„Би сакал да ја искористам оваа можност да се обратам до ФИФА: крајно време е да се престане со примена на двојни стандарди и да се третираат сите подеднакво“.
По овие зборови, Озил си создаде непријатели во Украина, а локалните медиуми сега објавуваат дека е вклучен во базата на податоци „Миротворец“. Ова е украинска невладина организација чија веб-страница собира и објавува податоци за луѓе што ги смета за „непријатели на Украина“.
Озил официјално ја заврши својата играчка кариера во март 2023 година, откако играше за турските клубови Фенербахче и Башакшехир.
Тој се сметаше за еден од најкреативните офанзивни играчи од средниот ред и најдобри асистенти на својата генерација. За време на неговата богата клупска кариера, тој ги носеше дресовите на великани како Шалке, Вердер Бремен, Реал Мадрид и Арсенал.
На национално ниво, тој беше клучен креатор во германската репрезентација, со која го освои Светското првенство во Бразил во 2014 година.
