Претседателот на ФИФА, Џани Инфантино, објави дека воведените паузи за хидратација за време на натпреварите ќе бидат анализирани, но дека постои голема можност тие да останат дел од практиката на идните Светски првенства.
Инфантино нагласи дека лично му се допаѓа идејата и верува дека има повеќе позитивни отколку негативни ефекти.
– Врз основа на ова искуство, ќе можеме да донесеме одлука за во иднина. Лично, ми се допаѓаат овие паузи. Тие се добредојдени за играчите, а се интересни и за навивачите – рече претседателот на ФИФА.
Станува збор за таканаречени паузи за хидратација, кои се користат во средината на двете полувремиња и траат околу три минути.
Иако беа воведени со цел да се заштитат играчите и да се подобрат условите за игра, тие сè повеќе привлекуваат критики бидејќи го прекинуваат ритамот на играта и, според некои во јавноста, отвораат простор за дополнителни тактички интервенции.
На стадионите во текот на целиот турнир, незадоволството на публиката е забележливо, а паузите сè повеќе се поздравуваат со свирежи.
Некои тренери и играчи веруваат дека на некои натпревари, каде што временските услови не се екстремни, ваквите паузи не биле неопходни.
Претседателот на ФИФА, сепак, ја брани практиката и тврди дека таа придонесува за квалитетот на играта.
– Дали е лошо играчите да добијат неколку минути одмор и да се вратат во полна сила? Не мислам така. Дали е лошо тренерите да имаат можност да ја менуваат тактиката? Исто така не мислам така – рече Инфантино.
Тој додаде дека, според него, овие паузи придонеле турнирот да се игра со најголем интензитет досега.
Иако критиките не стивнуваат, ФИФА не покажува знаци дека ќе ја поништи својата одлука.
Инфантино верува дека селективната примена на паузите, само во одредени временски услови, би била нелогична и нееднаква.
Паузите за хидратација остануваат тема на поделба во фудбалската заедница. Додека некои ги сметаат за корисна алатка за здравјето и тактиките, други сметаат дека го нарушуваат ритамот на играта.
ФИФА, засега, останува цврста во својот став – и покрај сè погласните критики.
