📽️ Верховен по контроверзниот пораз од Усик: Нема смисла, мислам дека ќе се жалиме

Потенцијалната жалба од Рико Верховен би можела да ги искомплицира плановите на Олександр Усик во тешка категорија токму кога се отвораа неговите најголеми борби. Верховен, по неговиот контроверзен пораз со прекин во саботата навечер, објави дека неговиот тим ќе разгледа жалба, тврдејќи дека борбата била прекината откако ѕвончето заѕвонило за крај на рундата, објави Boxing247.

Потегот синоќа одекна во светот на боксот, особено затоа што борбата беше неизвесна до самиот крај. Усик веќе беше поврзуван со неколку големи имиња, вклучувајќи трета борба со Тајсон Фјури, пресметка со Ентони Џошуа и можен меч против победникот од реваншот помеѓу Даниел Дубоа и Фабио Вордли. Официјална жалба од тимот на Верховен би можела сериозно да ги наруши тие планови.

Контроверзно прекинување по ѕвончето

Верховен ја објасни својата страна од приказната во интервју по борбата. „Сега го видов крајот поради сите коментари што ги прочитав. Ја прекинаа борбата по ѕвончето“, изјави Верховен за „Боксинг њуз“. „Значи, ѕвончето заѕвони, а потоа борбата беше прекината. Па мислам дека можеме да се жалиме бидејќи ова нема смисла, нели? Кога ѕвончето ќе заѕвони, тоа е мое време за одмор.“

ABSOLUTE CHAOS 😱 USYK STOPS RICO!!!#UsykRico pic.twitter.com/3OHnaXPUv5

— DAZN Boxing (@DAZNBoxing) May 24, 2026

Холанѓанецот предложи борбата да се прогласи за неважечка или победникот да се одлучи врз основа на картите на судиите до моментот на прекин. „Кога ќе го погледнете видеото, ѕвончето веќе заѕвонило. Судијата мора да биде свесен за тоа. Секако, се случуваат грешки, но во тој случај судијата треба да ја признае грешката и да каже: „Добро, борбата или е откажана или одиме на картите на судијата“, рече Верховен. „А ако одевме на поени, јас бев во водство.“

Што значи ова за плановите на Усик?

Поголемиот проблем за Усик е што Верховен создаде интерес за потенцијален реванш со својот настап. Пред натпреварот во сабота, многумина ја сметаа оваа кросовер борба за еднострана атракција. Сепак, Верховен пружи силен отпор, а мечот заврши со контроверзен прекин што стана главна тема на интернет.

Доколку тимот на Верховен поднесе официјална жалба, Усик ќе се соочи со избор: да го прифати реваншот, да се откаже од титулата за да може да продолжи со други борби или да преговара за финансиска спогодба што би му го отворила патот за неговата следна борба.

Верховен на крајот испрати порака до светот на боксот: „Најдов нова страст во борбените спортови. Се надевам дека го изненадив и шокирав светот на боксот бидејќи имам намера да останам“.