Данскиот фудбалер Кристијан Ериксен се раздели со Волфсбург, објави германскиот клуб.
Ериксен го одигра својот последен натпревар на 7 јуни против Украина, кога се сруши на теренот, што му се случи и пред пет години на Европското првенство, по што му беше вграден дефибрилатор.
Ериксен (34) рече дека му е важно да биде со своето семејство во Данска во моментов.
„Драго ми е што успеавме заедно да најдеме решение. Мојот период во Волфсбург беше обележан со многу подеми и падови. Знам дека клубот сега е во добри раце додека се стреми кон враќање во Бундеслигата и сум уверен дека Волфсбург има успешна иднина. Би сакал искрено да им се заблагодарам на сите што ме поддржуваа за време на мојот престој во Волфсбург. Беше големо задоволство да играм за вас и со задоволство ќе се навратам на овој период“, изјави данскиот фудбалер за веб-страницата на клубот.
Спортскиот директор на Волфсбург, Дитер Хекинг, рече дека договорот е раскинат по заедничка согласност.
„Ни беше јасно дека одлуката за неговата иднина мора да биде на Кристијан. Сакавме да му ја дадеме таа слобода во оваа специфична ситуација и сега го прифативме неговото барање за раскинување на договорот. Тој веќе искусил и постигнал многу во текот на својата исклучителна кариера. Уште поимпресивно е што се покажа како пристапен и приземен за време на неговиот престој во Волфсбург. И покрај краткото време тука, тој остави силен впечаток кај своите соиграчи, тренерскиот персонал и навивачите. Би сакале да му се заблагодариме на Кристијан и да му посакаме нему и на неговото семејство се најдобро“, рече Хекинг.
Ериксен потпиша двегодишен договор со „волците“ во септември 2025 година, за кои одигра 34 натпревари и постигна три гола. Тој одигра 151 натпревар за данската репрезентација и постигна 46 гола. Во текот на својата кариера, тој беше член на Ајакс, Тотенхем, Интер, Брентфорд и Манчестер Јунајтед.
